Störf þingsins.
Frú forseti. Við stöndum frammi fyrir miklum áskorunum í efnahagsmálum en líka áþreifanlegum árangri. Frá síðustu kosningum hafa vextir lækkað fimm sinnum. Verðbólga hefur ekki verið lægri í fimm ár. Halli ríkissjóðs hefur helmingast og skuldastaða ríkissjóðs hefur lækkað um 7,5% af landsframleiðslu. Til að setja málin í eitthvert samhengi þá leiðir 1,7% vaxtalækkun það af sér að mánaðarleg greiðslubyrði af 50 millj. kr. óverðtryggðu láni lækkar sem nemur u.þ.b. 60.000 kr. á mánuði. Þetta eru raunverulegar kjarabætur fyrir fólkið í landinu. Þetta gerist á vakt ríkisstjórnar sem leggur til raunhæfar leiðir en á sama tíma gerir kröfu til sjálfrar sín um að eiga hreinskiptið samtal við fólkið í landinu beint þar sem það er statt. Við þurfum að ráðast í alls konar verkefni, verkefni þar sem stjórnarandstaðan hefur ekki dug í sér til að segja: Nei, við höfum ekki efni á þessu. Við höfum ekki efni á uppbyggingu hjúkrunarheimila, atvinnustefnu, stofnun innviðafélags, heildarendurskoðun í málefnum barna og ungmenna með fjölþættan vanda. Þjóðin er enda réttilega að gera kröfur til þessara verkefna.
Og talandi um verkefni sem kosta — ég stenst ekki mátið að fagna því að karlar taki til máls undir liðnum störf þingsins í dag og ræði um fæðingarorlof. Það er frábært að karlar gefi sig að þessari umræðu og þeir mættu satt að segja vera miklu duglegri við það. Ég legg til og mun kalla eftir því að við ræðum hér nýútkomna skýrslu frá forsætisráðuneytinu sem nefnist Brúum umönnunarbilið. En ég vil hins vegar biðja alla hv. þingmenn, og þá sérstaklega karlana, að svara því og hafa svör á reiðum höndum um hvort það sé ásættanlegt í nútímaþjóðfélagi að fimm árum eftir barneign séu tekjur kvenna enn 25% lægri en þær voru fyrir fæðingu barns á meðan rauntekjur karla hækka. Þessu þurfa allir að svara. (Forseti hringir.) Eru lágar tekjur kvenna náttúrulögmál?
