stefna í neytendamálum til ársins 2030.

Herra forseti. Ég mæli fyrir hönd meiri hluta allsherjar- og menntamálanefndar fyrir nefndaráliti um tillögu til þingsályktunar um stefnu í neytendamálum til ársins 2030. Ég vil byrja á því að þakka samstarfsfólki mínu í allsherjar- og menntamálanefnd fyrir samstarfið, það gekk vel og var mjög gagnlegt.

Tillagan kveður á um framtíðarsýn neytendamála. Hún byggir á traustri umgjörð sem stuðlar að virkri samkeppni og veitir neytendum vernd, réttarstöðu og nauðsynlegar upplýsingar til að geta tekið upplýstar ákvarðanir um leið og óréttmætum viðskiptaháttum verði mætt af festu. Meginmarkmið stefnunnar verði að vinna eftir tíu þátta aðgerðaáætlun í samráði við helstu hagsmunaaðila í því skyni að tryggja framtíðarsýn í neytendamálum.

Nefndin fjallaði um málið, fékk á sinn fund gesti og bárust umsagnir. Gögn málsins eru aðgengileg undir málinu á vef Alþingis.

Í kjölfar umfjöllunar nefndarinnar um málið vill meiri hlutinn árétta sérstaklega: Málið er endurflutt og hefur áður komið til umfjöllunar hjá allsherjar- og menntamálanefnd. Nefndin fjallaði nokkuð ítarlega um málið á 156. löggjafarþingi og fékk þá gesti á fund sinn.

Meiri hlutinn fagnar fram kominni stefnu í neytendamálum til ársins 2030 og telur mikilvægt að hún nái fram að ganga. Þegar er hafin vinna við sumar aðgerðir stefnunnar og aðrar eru í mótun og undirbúningi. Allar aðgerðir stefnunnar eru til þess fallnar að bæta stöðu neytenda hér á landi og umsagnaraðilar voru almennt jákvæðir gagnvart stefnunni í heild þó að ýmsar ábendingar hafi komið fram, m.a. hvað varðar mögulega samstarfsaðila og fleiri atriði sem bent var á að tilefni væri til að taka til skoðunar, þar á meðal í tengslum við breytingar á lögum.

Þá fjallaði nefndin um að í sumum aðgerðum tillögunnar er fjallað um fyrirhugaðar lagabreytingar með það að markmiði að vinna að heildarendurskoðun og nútímavæðingu löggjafar á sviði neytendamála, m.a. á lögum um sölu fasteigna og skipa og lögum um fasteignakaup. Þá er stefnt að heildarendurskoðun löggjafar á sviði neytendamála með frumvarpi til nýrra markaðssetningarlaga, sem hefur þegar verið lagt fram á Alþingi. Frumvarpinu er ætlað að efla virka samkeppni í viðskiptum og öfluga neytendavernd sem taki mið af tækniþróun síðustu ára.

Meiri hlutinn telur mikilvægt að uppfæra löggjöf, m.a. á grundvelli skuldbindinga Íslands samkvæmt EES-samningnum. Meiri hlutinn undirstrikar jafnframt að með fyrirliggjandi tillögu til þingsályktunar sé verið að boða stefnu til næstu ára en jafnframt fari ítarlegri umfjöllun og frekara samráð fram þegar áðurnefnd frumvörp til laga verða lögð fram á Alþingi.

Meiri hlutinn telur að með stefnunni séu stigin jákvæð skref til hagsbóta fyrir neytendur í landinu og fagnar m.a. áherslu á eflingu neytendaverndar fyrir viðkvæma hópa og að gætt verði að mikilvægi íslenskrar tungu í markaðssetningu. Meiri hlutinn tekur þó jafnframt undir sjónarmið um að gæta þurfi meðalhófs svo að kröfur verði ekki of íþyngjandi og kostnaðarsamar fyrir fyrirtæki.

Að lokum bendir meiri hlutinn á að í greinargerð kemur fram að tillagan sé ekki að fullu fjármögnuð heldur fari mat á fjárhagslegum áhrifum fram eftir því sem aðgerðir stefnunnar mótast og tekið verði mið af því við gerð fjárlaga hvers árs fram til ársins 2030 og í uppfærslu á fimm ára ríkisfjármálaáætlun. Meiri hlutinn áréttar að stefnur sem þessar þurfa að vera innan þess ramma sem fjármálaáætlun kveður á um, annars koma þær ekki að fullu til framkvæmda. Beinir meiri hlutinn því til atvinnuvegaráðuneytis að gert verði ráð fyrir þeim útgjöldum í áætlun ráðuneytisins við uppfærslu á fimm ára fjármálaáætlun.

Að framansögðu virtu leggur meiri hluti allsherjar- og menntamálanefndar til að tillagan verði samþykkt óbreytt.

Undir álit meiri hluta allsherjar- og menntamálanefndar rita, auk þess sem hér stendur, hv. þingmenn María Rut Kristinsdóttir, Grímur Grímsson, Guðmundur Ari Sigurjónsson og Kolbrún Áslaugar Baldursdóttir.

Herra forseti. Ég hef lokið máli mínu.