afgreiðsla frumvarps úr velferðarnefnd.

Frú forseti. Ég verð að viðurkenna að ég hafði nú frekar vonast til þess að virðulegur forseti rifjaði ekki upp úrskurð er varðar 62. gr. starfsreglna fastanefnda í þessu samhengi. Því betur sem hann er skoðaður er hann, að mér sýnist, verr grundaður. Það getur ekki verið markmiðið með þessu ákvæði 62. gr., sem leitt var fram í þessum tiltekna úrskurði. Það sem ég vil vara virðulegan forseta við er að ef forseti kippir embætti sínu úr sambandi gagnvart því að aðstoða og stíga inn í nefndarstörf þegar mikið bjátar á, eins og iðulega hefur gerst og sérstaklega í virðulegri hv. atvinnuveganefnd og velferðarnefnd undanfarin misseri, þá erum við á þeim stað að hér verður allt í havaríi þegar nálgast þinglok, ekki bara á þessu þingi heldur til framtíðar. Þetta er grafalvarlegt mál og ég hvet virðulegan forseta til að skoða þann úrskurð (Forseti hringir.) sem forseti felldi í þarsíðustu viku því hann getur ekki verið lokaniðurstaðan varðandi afskipti og leiðbeiningar forseta gagnvart nefndastarfi hér í þinginu.