athugasemdir varðandi samráð og aðildarviðræður við ESB.
Virðulegi forseti. Það er margboðuð þingsályktunartillaga sem er að koma núna til umræðu hér á eftir. Ég hef líka sagt að ég muni mæta á fund á fimmtudaginn á nefndadegi þingsins fyrir utanríkismálanefnd eftir að þetta mál hefur komið hér til umfjöllunar og ég undirstrika að í þessu stóra innanríkismáli, sem þetta mál í rauninni er, er ekki hægt að hafa fallegra og betra og skilvirkara samráð en einmitt við þjóðina okkar, að eiga þetta samtal og hlusta síðan á hennar niðurstöðu og virða niðurstöðuna, að fara með þetta mál fyrir þjóðina og biðja hana að greiða atkvæði: Já, ég vil vita meira eða nei, ég vil ekki vita meira. Svo einfalt er þetta. En það sem ég fæ á tilfinninguna eftir allar þessar ræður og upphrópanir hér enn og aftur er að ég er bara sannfærð um að því oftar sem er farið inn í málið á þessum forsendum, því hræddari er stjórnarandstaðan við þjóðina. Í guðanna bænum, treystið þjóðinni fyrir þessu máli.
