athugasemdir varðandi samráð og aðildarviðræður við ESB.
Virðulegi forseti. Ríkisstjórnin fellur algerlega á fyrsta prófinu þegar kemur að þessari þingsályktunartillögu sem við munum ræða hér síðar í dag. Ég velti því fyrir mér hvort fólkið í landinu eigi ekki betra skilið. Það heyrir fyrst af þessari þjóðaratkvæðagreiðslu í erlendum fjölmiðlum. Síðan er hér haldinn blaðamannafundur um þingsályktunartillögu sem fyllir ekki einu sinni fjórar blaðsíður. Það er ekkert í þessari þingsályktunartillögu um lykilspurningar sem fólk í þessu landi þarf að fá að vita þegar það fer í þessa atkvæðagreiðslu. Það er ekkert um samningsmarkmið þessarar ríkisstjórnar, bara þessarar sem var í aðildarviðræðum hér fyrir 15 árum að verða. Það er ekkert þarna um kostnað af aðild að Evrópusambandinu. Það er ekkert um kostnað af aðildarferlinu sjálfu. Ég vil bara að lokum taka heils hugar undir það sem stjórnarandstöðuþingmenn hafa hér sagt: Þetta er þvílíkt mál að utanríkisráðherra hefði átt og á og ber að koma fyrir utanríkismálanefnd og það fyrst þegar málið fer til umræðu.
