þjóðaratkvæðagreiðsla um framhald viðræðna um aðild Íslands að Evrópusambandinu.

Virðulegur forseti. Ég vil þakka fyrir þetta andsvar sem er eitthvað svo fallegt dæmi um nákvæmlega það sem ég var að lýsa í ræðu minni, að hér er verið að endurtaka ræður úr EES-umræðunni, mála dökkar myndir af því sem EES-samningurinn myndi hafa í för með sér og hvernig eigi að fá undanþágu frá hinu og þessu. Þetta hefur hins vegar í meginatriðum reynst gríðarlega vel og allur hræðsluáróðurinn reyndist meira eða minna nákvæmlega það: hræðsluáróður. (Gripið fram í.) Ég vil bara, eins og ég gerði í minni fyrri ræðu, benda á þau ágætu samningsmarkmið sem náðist saman um eftir breitt samráð í samfélaginu í síðustu viðræðulotu. Ég held að þau markmið séu bara góður grunnur fyrir næstu lotu. Ég myndi bæta við ETS-útfærslu vegna flugs sem samningsmarkmiði sem var ekki mikið rætt á sínum tíma vegna þess að það var ekki komið til (Forseti hringir.) en síðasta ríkisstjórn undirgekkst. Markmiðið í þingsályktunartillögunni í greinargerðinni (Forseti hringir.) er því eitthvað sem ég bendi þingmanninum á að lesa.