Stefna til næstu ára þegar kemur að hlutafélögum í eigu ríkisins.

Frú forseti. Ég vil þakka hv. þingmönnum fyrir þessa ágætu umræðu og ég held að samtalið sýni, eins og fram kom í máli hv. þm. Jóhanns Friðriks Friðrikssonar, að það er býsna góður samhljómur um ýmislegt sem betur má fara. En ég vil kannski byrja á því að segja að það kemur mér alltaf á óvart hversu mikið frábrugðið það sem ég taldi mig vera að segja og það sem hv. þingmenn heyra getur verið. Ég skil með engu móti hvernig hv. þm. Nanna Margrét Gunnlaugsdóttir komst að þeirri niðurstöðu að ég hefði í máli mínu talað um að þetta ætti allt að vera í 100% ríkiseigu heldur þvert á móti talaði ég um að eignarhald ríkisins þyrfti að endurskoða reglubundið og að það þyrftu að vera mjög skýrar og strangar kröfur (Gripið fram í.) um hvaða rekstri ríkið tæki þátt í. Mér er með öllu fyrirmunað að skilja hvernig hægt var að misskilja þetta með þessum hætti.

Varðandi breytingar á skipan stjórnar þá skil ég mjög vel að það sé ergelsi úti yfir þessu, en ég tel að þarna hafi verið um mjög mikilvæga breytingu að ræða hvað varðar faglega stjórn. Það er raunverulega þannig að samkvæmt lögum skulu stjórnarmenn gæta hagsmuna fyrirtækisins sem þeir vinna fyrir og eigandans og það er mjög erfitt að hafa í þessu samhengi tvo herra. Ég held hins vegar að það sé mjög uppbyggilegt sem kom m.a. fram í máli hv. þm. Ingvars Þóroddssonar, að hugsanlega þurfum við að hafa opnara samtal um eigendastefnuna. Þetta kom raunar líka fram í máli hv. þm. Jóhanns Friðriks Friðrikssonar, það er mikilvægt að það sé samtal um þróun eigendastefnunnar og um þau tæki sem eðlilegt er að ríkið sem eigandi hafi gagnvart þessum fyrirtækjum.

Ég vil að þessu sögðu þakka hv. þingmönnum fyrir samtalið og vona að tækifæri gefist til að halda því áfram fljótlega.