utanríkis- og alþjóðamál 2025.
Frú forseti. Ég vil þakka hv. þm. Diljá Mist Einarsdóttur fyrir ræðuna og sömuleiðis hæstv. utanríkisráðherra fyrir skýrslugjöfina. Ég gat nú tekið undir margt af því sem kom fram í ræðu hv. þingmanns þar sem víða var farið yfir. Ég held að það sé svo sem ekkert leyndarmál að Viðreisn og Sjálfstæðisflokkurinn eiga ýmislegt sameiginlegt þegar kemur að utanríkismálum en það er þó a.m.k. eitt málefni, sem ég vil nú reyndar meina að sé frekar meiri háttar innanríkismál en meiri háttar utanríkismál, sem skilur flokkana svolítið að og ég held að það viti allir um hvað er verið að ræða þar. Það er stundum sett upp, þegar við erum að ræða um nánara samstarf við Evrópuríki, eins og verið sé að skjóta einhverjum fleyg inn í þjóðina. Sá fleygur er auðvitað búinn að vera til staðar ansi lengi. Það er ekkert hægt að stilla því þannig upp að önnur hliðin eigi tilkall til þess að tala um að ef hin hliðin hreyfir sig þá sé það einhver fleygur inn í einhverja þjóðarsál en ekki öfugt. Þannig getum við auðvitað ekki nálgast umræðuna.
Hv. þingmaður fór yfir það að ekki hefði verið kosið um Evrópusambandið í síðustu kosningum og það má alveg til sanns vegar færa. Það hefur stundum verið sagt í umræðunni núna að Viðreisn hafi ekki mikið talað um Evrópumálin í síðustu kosningabaráttu. Við töluðum reyndar vissulega um Evrópumál en vorum algjörlega skýr á því að efnahagsástandið í dag verður ekki lagað með því að ganga inn í Evrópusambandið eftir nokkur ár. Það hefur alveg verið ljóst þannig að þetta fer nú fram og til baka eins og kannski gefur að skilja. En einmitt af því að hv. þingmaður, sem ég er ósammála, var að tala um að það hafi verið kosið um þetta síðast þá voru auðvitað mjög mörg mál undir. Sumir tala mikið um heilbrigðismál og velferðarmál, aðrir tala um utanríkismál, sumir um Evrópusambandið og aðrir um eitthvað annað. Er bara ekki ofsalega hreinleg leið, þessi sem er fyrirhuguð, að vera með þjóðaratkvæði um það hvort það eigi að halda áfram viðræðum við Evrópusambandið og svo aðra þjóðaratkvæðagreiðslu ef samningurinn lítur dagsins ljós eftir já í þeirri fyrri? (Forseti hringir.) Er þetta ekki einmitt það sem þingmaðurinn er að kalla eftir, að við fáum bara hreina kosningu (Forseti hringir.) um þetta í eitt skipti fyrir öll? Þá er ekki hægt að fela sig á bak við einhver önnur mál sem auðvitað er kosið um samhliða í alþingiskosningum.
(Forseti (BHar): Forseti minnir hv. þingmenn á tímamörkin.)
