utanríkis- og alþjóðamál 2025.
Frú forseti. Ég vil byrja á að þakka hv. þm. Eiríki Birni Björgvinssyni fyrir sína ræðu. Þetta minnir mann svolítið á tímann í bæjarstjórn Akureyrar fyrir rúmum áratug. Þar tók maður þátt í hóp sem var að skoða ímynd Akureyrar og annað og þá einmitt lagði maður áherslu á Arctic í kynningarefni fyrir bæinn. Ég tek líka undir þessa umræðu um björgunarmiðstöðina, nú er Freyja komin fyrir norðan, búin að vera þar í þrjú, fjögur ár og sá sem hér stendur talar líka ötullega fyrir björgunarþyrlu á Akureyri sem er hluti af þessu dæmi. Íslendingar eru einmitt að stýra leitar- og björgunarsvæði sem er um 19–20 sinnum stærra en Ísland og það er öllum ljóst, held ég, mikilvægi þess að við gerum bragarbót og bætum þetta út frá svo mörgu. Það er hægt að hafa þetta í löngu máli sem snýr að leit og björgun og persónulega hefur maður tekið þetta upp við æðstu stjórnendur NATO, rætt þetta. Ég held að svona borgaralegt verkefni, „dual-use“ eða tvíhliða notkun, sé eitt besta verkefnið sem gæti fallið inn í 1,5%. Ég held að það séu ekki mörg verkefni sem gera það en auðvitað er mikil umræða og mörg verkefnin sem snúa að þessu.
Mig langaði rétt að koma inn á það því kannski misskildi ég eða misheyrði varðandi að það væri enn þá verið að tala á vettvangi þingmannaráðstefnu um norðurskautsmál meðal þingmanna sem taka þátt í því starfi, að norðurslóðir séu lágspennusvæði miðað við alla þá umræðu og allt sem er að gerast, meira að segja við Alaska núna þegar við sáum kínverskar orrustuþotur á æfingu í fyrra með Rússum fara upp að Beringssundi og upp að landamærum Alaska, sem sagt lofthelgi. Þannig að við erum að sjá alveg nýjar víddir í þessu. Það væri því fróðlegt að heyra: Er virkilega enn þá verið að tala um norðurslóðir sem lágspennusvæði?
