utanríkis- og alþjóðamál 2025.
Virðulegi forseti. Ég þakka hv. þingmanni kærlega fyrir hans ræðu. Úr því að þingmaðurinn kvartaði svolítið undan því að umræðan hefði mikið snúist bara um Evrópusambandið og ekki nógu mikið um samskipti við aðra og öryggis- og varnarmál, þá langar mig að fá viðbrögð þingmannsins við stefnu Bandaríkjanna, sérstaklega nýrri varnar- og öryggisstefnu Bandaríkjanna, þjóðaröryggisstefnu sem þau hafa birt. Bara svo maður grípi niður í nokkra hluti sem þar eru þá er þar talað um að draga úr hernaðarviðveru í Evrópu, semja um frið við Rússa, þrýsta á Úkraínu til að fallast á frið, jafnvel þó að það kunni að fela í sér töluverða eftirgjöf af þeirra hálfu. Síðan boða Bandaríkjamenn mjög mikil afskipti af innanlandsmálum í Evrópu og öðrum ríkjum, t.d. í formi skatta, stefnu í innflytjendamálum og loftslagsmálum. Bandaríkjamenn boða það að styðja við tiltekin öfl innan ríkja Evrópu og taka sérstaklega fram svokallaða föðurlandsvini, „patriotic“ öfl. Síðan er auðvitað mikill þrýstingur á að þvinga Evrópu til að kaupa bandarískar vörur frekar en að þróa sinn eigin iðnað. Að lokum er mjög mikil áhersla á notkun tolla, stóraukna notkun tolla til að verja sína framleiðslu en líka til að ná fram pólitískum markmiðum. Ég er bara að velta fyrir mér mati þingmannsins á þessari nýju stefnu Bandaríkjanna í þjóðaröryggismálum. Felur hún í sér áskoranir fyrir Ísland eða tækifæri? Og hvert er mat þingmannsins á því, af því að hann hefur auðvitað mikla reynslu sem utanríkisráðherra, hvernig Ísland ætti að haga sér í ljósi þessarar stefnu sem Bandaríkjamenn hafa nú birt?
