hópvernd og stuðningur við Úkraínu.

Frú forseti. Kannski fyrst lykilpunktarnir í umræðunni varðandi Úkraínu, að afstaða íslenskra stjórnvalda, ríkisstjórnarinnar á Íslandi, er auðvitað afdráttarlaus og eindregin um það að styðja við Úkraínu með öllum þeim hætti sem okkur er framast unnt. Það höfum við ekki síst gert með því að taka á móti fólki sem hingað hefur flúið. Þetta er nokkur hópur manna á liðnum árum.

Varðandi það frumvarp sem þingmaðurinn nefnir, frumvarp sem ég lagði fram, þá lýtur það að því sem rakið er í stefnuyfirlýsingu ríkisstjórnarinnar að við göngum í takt við Norðurlöndin og göngum í takt við Evrópu og það sem þar er verið að gera. Það er verið að horfa til þess þegar þessari hópvernd lýkur á hvaða forsendum hópurinn heldur þá áfram að vera hér eða á hvaða forsendum hann sækir um. Það er ekki rétt að stóri stabbinn af fólki muni þá sækja um alþjóðlega vernd, eða hæli, eins og þingmaðurinn kallaði það, heldur getur fólk þá sótt um á einstaklingsgrunni en ekki bara í nafni hópsins, út frá dvalarleyfum á borð við atvinnuleyfi, námsleyfi en líka vegna sérstakra tengsla. Og það blasir auðvitað við fyrir fólk sem hefur verið hér í mörg ár að þau tengsl eru í mörgum tilvikum komin á, þannig að í stóra samhenginu, og ég vil leyfa mér að segja um hópinn nánast allan, verður niðurstaðan óbreytt um það að Úkraínumenn eru velkomnir á Íslandi, eru það og verða það áfram og fólk mun halda áfram að koma hingað til lands.

Hins vegar er það þannig, af því að hann spyr um hvað gerist þegar þessari heimild lýkur á vormánuðum 2027, að það samtal stendur enn þá yfir innan Evrópu um hvernig verði fram haldið. Þar munum við gera það sama og við höfum áður gert, fylgjast með því hvaða tón og takt er verið að slá þar og ganga í takti við Norðurlöndin ekki síður. En ég vil ítreka og árétta að stuðningur okkar við Úkraínu er og verður afdráttarlaus.