siðareglur ráðherra.
Frú forseti. Í aðdraganda mikilvægrar atkvæðagreiðslu varðandi viðræður við ESB hefur ríkisstjórninni verið tíðrætt um ógnina af upplýsingaóreiðu. Það er vel, en því er með ólíkindum hversu mikil upplýsingaóreiða stafar frá ríkisstjórninni sjálfri í þessu mikla hagsmunamáli þjóðarinnar. Eitt af þeim veigamiklu, hlutlægu atriðum sem þjóðin þarf að fá upplýsingar um, sem hefur ekkert með tilvonandi samningaviðræður að gera, eru kostir og gallar þess að taka upp evru. Það er því mikið áhyggjuefni að í tilkynningu frá Stjórnarráðinu séu niðurstöður skýrslu um kosti þess og galla orðaðar meira afgerandi en í sjálfri skýrslunni. Ég vil af því tilefni, frú forseti, drepa niður í siðareglum ríkisstjórnarinnar. Þar segir að ráðherra skuli beita sér fyrir því að upplýsingum sé miðlað af nákvæmni, heilindum og með skýrum hætti. Enn fremur segir að ráðherra skuli hafa frumkvæði að því að leiðrétta eins fljótt og auðið er rangar eða villandi upplýsingar sem og hvers kyns misskilning er varðar málefni sem heyrir undir ráðherra.
Í ljósi þess að siðareglur þessar voru undirritaðar af forsætisráðherra, Kristrúnu Frostadóttur, þann 11. mars 2025, vil ég spyrja hæstv. forsætisráðherra: Hvernig stenst kynning Stjórnarráðsins á niðurstöðum þessarar mikilvægu skýrslu siðareglur ríkisstjórnarinnar?
