samgönguáætlun fyrir árin 2026--2040 ásamt fimm ára aðgerðaáætlun fyrir árin 2026--2030.

Virðulegi forseti. Ég vil þakka hv. þingmanni og formanni umhverfis- og samgöngunefndar fyrir afskaplega góða spurningu. Maður finnur það svo vel þegar maður býr vestur á fjörðum, hún þekkir náttúrlega jafn vel til og ég, þessa skammsýni í jarðgöngum. Það munaði engu að það yrði stórslys þegar kviknaði í rútu í Tungudalnum við munna Vestfjarðaganga og það hefði náttúrlega verið hræðilegt ef það hefði gerst. En svo er það líka þannig að þegar göngin voru opnuð 1995 eða 1996 þá var ekki sama umferð og er núna. En nú er það þannig að í daglegu lífi íbúanna sem búa á Flateyri, Ísafirði, Þingeyri, Suðureyri, Bolungarvík, eru þeir farnir að hugsa um hvað séu mörg skip í landi á Ísafirði. Það sem gerist þegar skemmtiferðaskipin koma til hafnar er að þá geta verið hátt í 20 rútur sem fara í gegnum göngin og það er bara ekkert rosalega gaman að vera í einbreiðum göngum með fullt af ferðamönnum að auki að komast á milli. Ég veit að þetta hefur áhrif á daglegt líf fólks, það reynir að sníða ferðir sínar þannig að það fari áður en skipin koma að landi eða á eftir. Það er ekki gaman að hugsa um þetta. En að sama skapi hef ég oft hugsað um þetta: Hvað voru þeir að hugsa, þeir sem tóku þessa ákvörðun? Og ég hef oft hugsað: Verðum við dæmd út frá verkum okkar hér? Ég hef líka oft hugsað um að ef við hefðum haft legginn til Suðureyrar, þ.e. ef við hefðum ekki haft hálf göngin einbreið hefðum við þá tengt við Suðureyri? Ef við hefðum ekki gert það þá held ég að Suðureyri væri á dálítið öðrum stað en núna. Við íbúar á Vestfjörðum höfum farið í gegnum alls konar sveiflur en íbúafjöldi á Suðureyri hefur nefnilega verið merkilega stöðugur. Þar hefur verið gott atvinnuástand, (Forseti hringir.) góð fyrirtæki. Maður verður dæmdur af ákvörðunum sínum og þá held ég, eins og hv. formaður nefndarinnar nefnir, að við verðum að þora að taka ákvörðun um að horfa fram á veginn.