26.11.1980
Neðri deild: 23. fundur, 103. löggjafarþing.
Sjá dálk 960 í B-deild Alþingistíðinda. (861)

93. mál, tollheimta og tolleftirlit

Flm. (Alexander Stefánsson):

Herra forseti. Á þskj. 103 flyt ég ásamt hv. 4. þm. Vesturl., hv. 2. landsk. þm. og hæstv. dómsmrh. frv. til l. um breyt. á lögum nr. 59 frá 28. maí 1969, um tollheimtu og tolleftirlit. Breytingin er í því fólgin að upphaf 4. mgr. 7. gr. laganna orðist þannig:

„Auk aðaltollhafna eru hafnir í eftirtöldum kaupstöðum og kauptúnum tollhafnir samkv. lögum þessum:

1. Borgarnes, 2. Rifshöfn, 3. Ólafsvík, 4. Grundarfjörður, 5. Stykkishólmur, 6. Patreksfjörður o.s.frv.“ Þessi breyting gengur út á það að bæta inn í greinina tveimur höfnum, þ.e. Rifshöfn og Grundarfjarðarhöfn. Þetta frv. var flutt tvisvar áður, á 100. og 102. löggjafarþingi, og í hvorugt skiptið náði frv. fram að ganga vegna þess að það var svo liðið á þinghaldið.

Hér er um að ræða nauðsynlega aðgerð að okkar mati, en eins og stendur í tollalögum er tollhöfn höfn þar sem ferma má og afferma ótollafgreiddar vörur og geyma og tollafgreiða slíkar vörur án sérstakrar heimildar.

Ég þarf ekki að hafa langt mál um þetta. Það þýðir að ef frv. verður samþ. verða tollhafnir sem slíkar 22 í stað 20 eins og nú er. Þetta er að okkar mati eðlileg ráðstöfun. Á báðum þessum stöðum er mikil skipakoma. Bæði koma á þessar hafnir skip beint erlendis frá, sem þarf að tollafgreiða, og einnig er talsvert um að frá öllum þessum höfnum á norðanverðu Snæfellsnesi sé mikill útflutningur og hefur komið oftar en einu sinni fyrir, jafnvel oft í mánuði, að tollafgreiða þurfi skip frá þessum höfnum.

Ég ætla ekki að hafa lengri framsögu um þetta mál. Ég vísa til framsögu sem núv. hæstv. dómsmrh. flutti hér 28. jan. s.l. þegar þetta frv. var flutt í annað sinn. Þar komu fram þau meginrök og sögulegu rök sem væri eðlilegt að flytja með þessu frv.

Ég legg til, herra forseti, að að lokinni þessari umr. verði frv. vísað til 2. umr. og fjh.- og viðskn.