08.02.1983
Sameinað þing: 48. fundur, 105. löggjafarþing.
Sjá dálk 1780 í B-deild Alþingistíðinda. (1525)

114. mál, veðurfregnir

Sverrir Hermannsson:

Herra forseti. Ég leyfi mér að þakka hæstv. samgrh. fyrir svör hans. Sumt var torskilið fyrir mig, eins og til að mynda, sem mér heyrðist koma fram í upphafi svars hans, að Veðurstofan haldi því fram að um þessa þjónustu hefði ekki verið beðið. Síðar kom það greinilega fram, enda staðfest af Landssímanum, að þar hefðu farið fram viðræður um sérstakar viðbótargreiðslur vegna þessarar þjónustu. Mér finnst því Veðurstofan fara ofurlítið huldu höfði í svörum sínum.

En það kemur fram að heildarkostnaður vegna þessarar þjónustu var milli 500–600 þús. á þessu tiltekna ári, sem mér heyrðist vera 1982, og ef það er ætlun Landssímans að taka vegna þessarar þjónustu 25% af þeirri fjárhæð sérstaklega, þá er það ekkert nema okurstarfsemi.

Það er misskilningur að það séu mjög fáir bátar með metrabylgju. Þó þeir væru ekki nema innan við 10, sem væru búnir þessum búnaði, metrabylgjustöðvunum, væri það ærið nóg. En það er nú svo, eins og kom hér fram hjá hv. 4. þm. Norðurl. e., að í Vestmannaeyjum einum eru milli 30 og 40 bátar þannig búnir. Þetta eru bátar samkv. reglugerð um radíóbúnað skipa, trillur og þilfarsbátar að 15 m að lengd, þ. e. allt upp í 30 smálestir. Eins og ég sagði hér í upphafi eru það þau skipin sem allra helst þurfa á þessu að halda. Og mér er spurn: Í hverju liggur þessi viðbótarkostnaður? Er það í sendiorkunni sem þarf að beita við útsendinguna? Það eru vaktir á þessum strandstöðvum. Hver ósköpin eru þetta annað en tilraun til þess að ná inn fé langt umfram það sem eðlilegt getur talist?

Þegar ég talaði um örfáar krónur var ég að tala um þann beina viðbótarkostnað sem af þessu kynni að hljótast. sendiorkan er ekki mikil sem til þessa þarf og ég get ekki ímyndað mér að það þurfi að borga einhverja sérstaka yfirtíð hjá vaktmönnunum við að lesa þetta, sem áreiðanlega flestir telja það meira en sjálfsagt þó að þeir fái ekki fyrir það sérstakar greiðslur. Hér er um útsendingar að tefla sem standa í um mínútu, milli 1 og 2 mínútur. Þið hafið kannske tekið eftir því að senditímarnir eru 10:48, 16:48 0. s. frv., tveim mínútum áður en reglulegur upplestur hefst í gegnum aðalstöð kannske. En ég ætla ekki að fara fleiri orðum um þetta.

Ég segi ekki fleira en það, að ef togstreitan milli tveggja opinberra stofnana eins og Landssímans og Veðurstofunnar á að ráða því að þessari sjálfsögðu þjónustu verði ekki haldið áfram líst mér ekkert á þetta kerfi. Og ég segi að við eigum ekkert að vera að standa frammi fyrir því að stóróhöpp verði vegna þess að þarna togist þessar stöðvar á um sömu peningana — peningana sem allt að einu eru þá í eigu ríkisins því að hvort tveggja eru opinberar stofnanir. Þess vegna skora ég á hæstv. samgrh. að kippá þessu í liðinn. Mér heyrðist nú enda, þótt hann fullyrti ekki mikið, að hann hefði til þess fullan vilja.