15.12.1986
Neðri deild: 21. fundur, 109. löggjafarþing.
Sjá dálk 1742 í B-deild Alþingistíðinda. (1498)

246. mál, Ríkismat sjávarafurða

Frsm. sjútvn. (Stefán Guðmundsson):

Herra forseti. Hér hafa orðið nokkrar umræður. Ég stend upp aðallega út af orðum hv. þm. Karvels Pálmasonar. En ég vil byrja á því að segja vegna þess sem hv. þm. Tryggvi Gunnarsson sagði hér í umræðunni, að Sjómannasamband Íslands hefði hafnað þessu, það er ekki alveg rétt (TG: Það stendur í grg.) Við skulum lesa hvað stendur. Í grg. stendur:

„15. þing Sjómannasambands Íslands hafnar þeirri hugmynd að leggja Ríkismat sjávarafurða niður meðan ekki hefur komið fram nein haldbær tillaga um hvað leysa skuli Ríkismatið af hólmi. Þingið vísar því til sambandsstjórnar Sjómannasambands Íslands að hún eigi frumkvæði að aðild að því að hagsmunaaðilar í sjávarútvegi komi sér saman um framtíð fiskmatsins og hvað koma skuli í stað þess.“

Þetta er samþykkt Sjómannasambandsins þannig að ég lít ekki svo á og vil ekki skilja það svo að þing Sjómannasambands Íslands hafi hafnað þessari hugmynd.

Hv. þm. Karvel Pálmason vék að nokkrum þáttum þessa máls. Ég skildi hann svo að nefndin hefði ekki unnið starf sitt vel og ekki gefist tími til að skoða málið. Hv. þm. spurði: Hverju er verið að breyta? Mér finnst að hv. þm. hafi ekki mikið kynnt sér þetta mál ef hann veit ekki hvað hér er verið að fjalla um.

Hann segir einnig að það sé mikil þörf á því að breyta Ríkismati sjávarafurða. Menn tala um það sem eitthvert feimnismál að breyta þurfi Ríkismati sjávarafurða. Ég vil leyfa mér að lesa hér hvað stendur í grg. með frv. Það stendur hér, hv. þm.: „Yfir stendur endurskipulagning á stofnuninni í heild (Ríkismati sjávarafurða), sem mun að sjálfsögðu taka mið af afnámi skyldumatsins og reynslu af nýju gæðamatskerfi á ferskum fiski, ef tillögur frv. þessa ná fram að ganga.“ Það er sem sé verið að vinna að því að endurskipuleggja Ríkismat sjávarafurða. Ég er nú einn þeirra sem hafa unnið við þessi mál og þurft að eiga viðskipti við þessa stofnun og ég verð að segja að ég held að hún þoli það alveg að vera skoðuð. Mér heyrist það einnig á þeim mönnum sem hér tala að þeir séu yfirleitt á því. En ég held líka að ljóst sé að það vinnst ekki tími til þess nú. Það þarf að gera og menn þurfa að gera það í næði og gefa sér góðan tíma til þess að fara yfir það mál allt. Það frv. sem hér er um fjallað gerir ráð fyrir að fella niður ferskfiskmatið.

Hv. þm. Karvel Pálmason spurði mig einnig hvernig það mætti vera að fulltrúar frá Sjómannasambandi Íslands og Farmanna- og fiskimannasambandi Íslands hefðu ekki verið kallaðir fyrir nefndina. Það er ofur eðlilegt að spurt sé. Það hlýtur að vera spurt af því að hv. þm. hefur ekki verið hér inni þegar ég talaði fyrir nál. en þá skýrði ég frá því hver ástæðan hefði verið til þess. Fulltrúar Sjómannasambandsins og Farmanna- og fiskimannasambandsins voru boðaðir til fundar við nefndina eins og aðrir sem hv. þm. taldi upp og við kölluðum hagsmunaaðila og vissulega eru þetta hagsmunaaðilar að þessu samkomulagi. En því miður gátu þeir ekki komið því við að mæta á fund nefndarinnar, fulltrúar Sjómannasambands Íslands og Farmanna- og fiskimannasambandsins. (GJG: Biðu þeir ekki fyrir utan í 40 mínútur?) Nei, þeir biðu aldrei neitt fyrir utan vegna þess, hv. þm., að fulltrúar hagsmunaaðila sátu allir inni hjá okkur í einu, þannig að þeir biðu aldrei fyrir utan hjá okkur. Ef hv. þm. heldur það þá er hér um einhvern misskilning að ræða. Þeir voru boðaðir til fundar með okkur og ég held að ég segi satt og rétt frá að þeir þurftu á sama tíma að vera á nefndarfundi sjútvn. Ed., þar sem ég held að hafi verið fjallað um sjómannadag. Ég held að það hafi verið ástæðan fyrir því.

Hins vegar sagði ég það, og vil undirstrika það hér, að ég hef rætt við þessa menn. Ég gerði það síðast í dag, bæði við formann Sjómannasambandsins og formann Farmanna- og fiskimannasambandsins. Ég ræddi við þá saman. Að vísu ræddi ég lengur við formann Farmanna- og fiskimannasambandsins og það fór ekki á milli mála að hann var sammála þessu nál. Hins vegar voru þeir ekki tilbúnir, eins og fram kemur, að samþykkja tillögu formanns Landssambands ísl. útvegsmanna, sem var um það að leggja Ríkismatið niður nú þegar. Því sagði ég það að hér hafa menn mæst eða reynt að finna leið til sátta til þess að stíga þetta skref.

Ég vil sjá það og ég vonast til þess að menn beri gæfu til þess að leysa þetta mál síðan um endurskoðun á lögum um Ríkismat. Hér er fyrst og fremst verið að tala um að fella niður ferskfiskmatið.