11.02.1988
Sameinað þing: 46. fundur, 110. löggjafarþing.
Sjá dálk 4454 í B-deild Alþingistíðinda. (3077)

244. mál, launastefna ríkisins

Kristín Halldórsdóttir:

Herra forseti. Ég er aðili að þessari fsp., en mér leyfist væntanlega ekki meira en stutt athugasemd. (Forseti: Nei, það er 1. fyrirspyrjandi sem nýtur réttar sem fyrirspyrjandi. Það er viðtekin regla í þingsköpum.)

Herra forseti. Ég get því miður ekki sagt að ég hafi orðið fyrir neinum vonbrigðum með svör hæstv. ráðherra af þeirri einföldu ástæðu að ég átti ekki von á merkilegri svörum en við fengum Því miður virðast stjórnvöld ekki komin lengra en svo þrátt fyrir alla umræðuna að þau treysta sér ekki til þess að framfylgja orðum sínum sem þó eru skráð og skjalfest. Og ég má til með, herra forseti, með þínu leyfi, að lesa upp örfá orð úr starfsáætlun ríkisstjórnarinnar sem hljóða svo:

„Átak verður gert til að koma á jafnrétti kvenna og karla með sérstakri áherslu á launajafnrétti. Störf kvenna hjá hinu opinbera verði endurmetin. Við þetta endurmat verði m.a. höfð hliðsjón af mikilvægi umönnunar- og aðhlynningarstarfa og starfsreynslu á heimilunum.“

Ég heyrði ekki, herra forseti, á máli hæstv. ráðherra að þeir myndu þessi orð. Ég hlýt að ítreka þá fsp. sem hér liggur fyrir og ráðleggja hæstv. ráðherrum að líta oftar í starfsáætlun sína og ég hlýt að spyrja þá: Hvar er átakið, hæstv. ráðherrar? Ég heyrði ekki minnst á neitt átak.