29.04.1988
Efri deild: 82. fundur, 110. löggjafarþing.
Sjá dálk 7018 í B-deild Alþingistíðinda. (4961)

432. mál, Ríkisendurskoðun

Guðrún Agnarsdóttir:

Herra forseti. Nú gat ég ekki verið viðstödd umfjöllun hv. fjh.- og viðskn. á þessu máli þar sem ég sat á sama tíma í heilbr.- og trn. þar sem ég er skrifari, en ég er einungis áheyrnaraðili í fjh.- og viðskn. Þess vegna gat ég ekki fylgst með umfjöllun málsins í nefndinni eins og ég hefði þó gjarnan viljað, en það verður ekki verið á tveimur stöðum í einu. Því vil ég spyrja hv. formann nefndarinnar: Var haft samband við fulltrúa hinna beinu málsaðila í þessu máli, þ.e. stjórn læknafélaganna og Tryggingastofnun? Sú della sem var í málinu upphaflega er fyrst og fremst á milli Tryggingastofnunar og þeirra lækna sem inna af hendi þjónustu og fá hana endurgreidda frá þeirri stofnun. Ég vísa til erindis sem var sett í pósthólfið mitt og er frá Gunnari Inga Gunnarssyni, yfirlækni Heilsugæslustöðvarinnar í Árbæ, en tilefni flutnings þessa frv. var m.a. einmitt reikningsskil þeirrar stöðvar.

Í öðru lagi langar mig að spyrja hv. formann nefndarinnar: Nú er til umfjöllunar í Nd. og mun væntanlega verða okkur sent innan tíðar frv. til nýrra læknalaga og þar segir í 15. gr. svipað og gerir í núgildandi lögum: „Lækni ber að gæta fyllstu þagmælsku og hindra það að óviðkomandi fái upplýsingar um sjúkdóma og önnur einkamál er hann kann að komast að sem læknir. Þetta gildir ekki bjóði lög annað, enda sé rökstudd ástæða til þess að rjúfa þagnarskyldu vegna brýnnar nauðsynjar.“ Hefur nefndin gaumgæft þetta, og hvort það stangast á við erindi frv.?

Ég ítreka þá skoðun mína, sem ég hef lýst yfir áður, það er mjög nauðsynlegt að ríkið og stofnanir þess geti fengið sem gleggstar upplýsingar um þau störf sem það greiðir fyrir. Ég styð það eindregið.

Hins vegar er einnig um að ræða trúnað á milli lækna og sjúklinga sem verður að fara með af ýtrustu varkárni. Vegna þess að umræður standa yfir milli málsaðila og málin eru nánast að leysast langar mig til að spyrja þessara spurninga því ég tel að reikningseftirlitið hljóti fyrst og fremst að vera hjá Tryggingastofnun og ekki nema á síðari stigum málsins, ef annað þrýtur, hjá Ríkisendurskoðun.