Afnám laga um Tækniháskóla Íslands.
Björgvin G. Sigurðsson (Sf) (andsvar):
Virðulegi forseti. Fátt kemst að í stuttu andsvari þannig að ég ætla að vinda mér beint að efninu.
Ég vil byrja á því að ítreka þá spurningu sem fram kom fyrr í dag hjá hv. þm. Jóni Bjarnasyni í sambandi við frumgreinadeildina: Fá þeir nemendur sem nú hafa hafið nám í frumgreinadeildinni að ljúka tækninámi sínu sem þeir fara í eftir frumgreinadeildina gjaldfrítt, án þess að innheimt verði af þeim frekari skólagjöld en nú? Þetta þarf að vera á hreinu.
Þá vil ég spyrja hæstv. ráðherra aftur, hún svaraði sumu áðan en alls ekki öllu: Hvað með verðmat á eignum og vild Tækniháskólans eins og það er í dag? Er það einskis metið, er það núll? Ef svo er, af hverju er það svo?
Að lokum: Finnst hæstv. ráðherra eðlilegt að taka tæknifræðina með þessum hætti út úr grunnnámi á háskólastigi og innheimta fyrir það skólagjöld í einkareknum háskóla meðan svo er ekki um annað nám? Tekur hæstv. ráðherra ekki undir að hér sé um mismunun að ræða á milli nemenda og greina?
