Varamaðut tekur þingsæti.
Forseti (Halldór Blöndal):
Borist hefur svohljóðandi bréf um forföll þingmanns frá varaformanni þingflokks Samfylkingarinnar, Kristjáni L. Möller, dagsett 9. desember 2004:
„Þar sem Ásta R. Jóhannesdóttir, 4. þm. Reykv. s., er erlendis í opinberum erindum og getur ekki sótt þingfundi á næstunni óska ég eftir því, með vísan til 2. mgr. 53. gr. þingskapa, að 3. varaþingmaður á lista Samfylkingarinnar í Reykv. s., Jakob Frímann Magnússon tónlistarmaður, Reykjavík, taki sæti hennar á Alþingi á meðan, en 1. og 2. varamaður á listanum eru forfallaðir, samanber bréf þeirra.“
Þá hefur borist svohljóðandi bréf frá 1. varaþingmanni Samfylkingarinnar í Reykv. s., Einari Karli Haraldssyni, dagsett 9. desember 2004:
„Tilkynni að vegna anna get ég undirritaður varaþingmaður Samfylkingarinnar í Reykv. s. ekki tekið sæti á Alþingi í fjarveru Ástu R. Jóhannesdóttur, 4. þm. Reykv. s., frá og með 4. desember fram að jólaleyfi þingmanna.“
Einnig hefur svohljóðandi bréf borist frá 2. varaþingmanni Samfylkingarinnar í Reykv. s., Kristrúnu Heimisdóttur, dagsett 9. desember 2004:
„Vegna anna get ég ekki að þessu sinni tekið sæti Ástu R. Jóhannesdóttur, 4. þm. Reykv. s., á Alþingi. Þetta tilkynnist hér með.“
Kjörbréf Jakobs Frímanns Magnússonar hefur þegar verið rannsakað og samþykkt en hann hefur ekki áður tekið sæti á Alþingi og ber því að undirskrifa drengskaparheit að stjórnarskránni.
[Jakob Frímann Magnússon, 4. þm. Reykv. s., undirritaði drengskaparheit um að halda stjórnarskrána.]