Tekjuskattur og eignarskattur.
Lúðvík Bergvinsson (Sf) (andsvar):
Virðulegi forseti. Tillögur okkar liggja fyrir og hv. þingmanni er í lófa lagið að líta inn í hliðarsal og skoða þær tillögur eða fylgjast með umræðunni.
Ég vildi aðeins nefna það, þótt það sé ekki mitt að taka hv. þingmann í einhvers konar hagfræðikennslu og ég líti ekki á það sem hlutverk mitt, en hagvaxtarspár fjármálaráðuneytisins gera ráð fyrir 5% hagvexti. Í sömu spá fjármálaráðuneytisins er hins vegar gert ráð fyrir 7% aukningu á skatttekjum. Hvernig getur … (GÞÞ: Hverjar eru tillögurnar um að lækka jaðarskattana?) Hvernig getur hv. þm. … (GÞÞ: Hverjar eru tillögurnar um að lækka jaðarskattana? Það er það sem ég spurði þig að.) Tillögurnar liggja hérna. (Forseti hringir.)
(Forseti (SP): Forseti biður hv. þingmenn að gefa ræðumanni hljóð.)
Virðulegi forseti. Ég þarf svo sem ekki á aðstoð forseta að halda í þessum efnum. En ég lít ekki á það sem mitt hlutverk að kenna hv. þingmanni mannasiði.
Ég vil nefna í þessari umræðu að skatttekjurnar eru að aukast umfram hagvöxtinn og vildi ég vekja (Forseti hringir.) athygli hv. þingmanns á því.
