Samgöngur milli Keflavíkurflugvallar og höfuðborgarsvæðisins.

Forseti. Ég þakka hæstv. samgönguráðherra fyrir greið svör við fyrirspurn minni. Umræðan hefur teygt sig víða og þó einkum þangað sem fiskurinn lá undir steininum, sem er auðvitað flugvellirnir tveir, í Reykjavík og í Keflavík.

Ég held að Reykjavíkurflugvöllur sé á förum hvað sem menn vilja og að það sé ósköp einfaldlega buddan sem mun endanlega reka okkur til þess að finna lausn á málinu því ég spái því að menn þoli það ekki á Alþingi eða annars staðar þar sem farið er með fé almennings að menn ætli að borga fyrir mjög dýra þjónustu á tveimur flugvöllum með ekki nema nú 39 mínútna millibili.

Vel kemur hins vegar til greina, eins og stundum er í borgum, að hafa einhverja flugbraut, ég segi nú ekki í Vatnsmýrinni en einhvers staðar í nágrenninu þar sem hentugt er og menn geta sætt sig við, sem hleypi þeim flota til Reykjavíkur sem mest kvarta undan Keflavíkurvinklinum, þ.e. stjórnmálamönnum, forustumönnum í sveitarstjórnum og forstjórum í fyrirtækjum. Það yrði eins og City-flugvöllurinn í London sem ég var nýverið að skoða, þ.e. London en ekki flugvöllinn, en sá þá City-flugvöllinn á kortinu.

Ég vil byrja á því að hrósa hæstv. samgönguráðherra fyrir lofsverða frammistöðu í málefnum Reykjanesbrautar eða Keflavíkurvegar, en síðan vil ég biðja hann endilega að passa sig á því að hann og menn hans standi ekki á móti nauðsynlegum þörfum og arðbærum umferðarbótum milli Keflavíkurflugvallar og Reykjavíkur vegna ástar sinnar á þeim flugvelli sem Bretar settu hér niður í óþökk Íslendinga í heimsstyrjöldinni síðari.