Stuðningur Íslands við þjálfun írakskra öryggissveita.
Sólveig Pétursdóttir (S):
Hæstv. forseti. Írak var áður eitt mesta harðstjórnarríki heims. Þar réð ríkjum Saddam Hussein sem skákaði í skjóli einræðis og beitti jafnvel gereyðingarvopnum til að murka lífið úr eigin þegnum.
Í dag er þetta ríki nýjasta lýðveldi heimsins. Þar eru nú nýafstaðnar lýðræðislegar kosningar sem svo sannarlega marka tímamót. Ísland ásamt öðrum NATO-ríkjum hefur heitið því að styðja við uppbygginguna í Írak.
Þegar íslenska ríkið lýsti yfir stuðningi við aðgerðir bandamanna í Írak fólust í því fyrirheit um að styðja við uppbygginguna að aðgerðum loknum. Nú er röðin komin að okkur. Öll 26 aðildarríki NATO hafa heitið stuðningi við uppbyggingu írakskra öryggissveita en forsendur þess að herir bandamanna geti dregið sig til baka frá Írak er að landið geti séð um eigin öryggismál. Ljóst er að enn er hópur ófriðarseggja sem ekki vilja lýðræðislegar umbætur í Írak og hafa gert atlögu að löglega kjörnum stjórnvöldum og saklausum borgurum og virðast ætla að gera allt sem í þeirra valdi stendur til þess að hindra að írakska þjóðin fái notið þeirra sjálfsögðu mannréttinda að fá að lifa í lýðfrjálsu landi, laus við stöðugar ógnir og hótanir. Nú síðast í morgun bárust fréttir um að írakskur dómari og sonur hefðu verið skotnir til bana fyrir framan heimili sitt í Bagdad í morgun. Þeir unnu báðir við dómstól sem stofnaður var til að rétta yfir Saddam Hussein og nánustu samstarfsmönnum hans.
Það er alveg ljóst að bráðnauðsynlegt er að tryggja öryggi írakskra borgara, stjórnvalda, þings og dómstóla til að Írak nái að þroskast eins og önnur lýðræðisríki. Írak tryggir best eigið öryggi með sínum eigin öryggissveitum en til þess þarf ríkið aðstoð í formi þjálfunar, búnaðar og fjármuna. Það er skylda okkar að leggja eitthvað af mörkum til að tryggja öryggi írakskra borgara og það gerum við með því að styðja starfsemi NATO á svæðinu.
