Hellisheiði og Suðurstrandarvegur.

Virðulegi forseti. Það eru gríðarleg vonbrigði að Suðurstrandarvegur skuli hafa dottið fyrirvaralaust út úr vegáætlun, horfið þaðan nánast sporlaust.

Ég vil líka nota tækifærið hér til að benda á að stjórnarþingmenn í Suðurkjördæmi, þingmenn Sjálfstæðisflokks og Framsóknarflokks, eru eins og lufsur í þessu máli. Þeir virðast ætla að láta þetta yfir sig ganga eins og ekkert sé. Þeir taka ekki til máls í umræðum um vegáætlun, þegja þunnu hljóði, eru hér á samsærisfundum með útvöldum sveitarstjórnarmönnum úr kjördæminu til að ráðskast um það hvort fara eigi í Suðurstrandarveg eða ekki. Síðan kemur það eins og skrattinn úr sauðarleggnum að þessi vegur hafi verið sleginn af. Málið hefur ekki verið rætt við okkur þingmenn í kjördæminu og það ætti að vera fyrsta forgangsverk samgönguráðherra, ef hann vill ná sátt um þessi mál, að sjá til þess að málið fari í gegnum almennilega umræðu við þingmenn kjördæmisins. Svona vinnubrögð hljóta að vera með öllu ólíðandi.