Fjárhagsstaða meðlagsgreiðenda.
Björgvin G. Sigurðsson (Sf):
Virðulegi forseti. Hér hafa verið nefndar ansi afdráttarlausar og sláandi tölur sem hljóta að kalla á að hæstv. ráðherra setji í gang úttekt á ástæðum fyrir því að svo stór hópur meðlagsgreiðenda sé í vanskilum.
Eins og fram kom áðan þá blasir við og er alkunna að einstæðir feður eru drjúgur hluti þess hóps í samfélaginu sem á oft í hvað mestum erfiðleikum með að ná tökum á lífi sínu, þar sem sjálfsvígstíðnin er hæst, drykkjuskapur mestur og félagslegar aðstæður hvað ömurlegastar og verstar. Það los sem virðist koma á líf manna við að ganga í gegnum hjónaskilnað og félagslegt rót sem því fylgir virðist oft koma þeim í mjög erfiðar aðstæður. Það verður að gera gangskör í að rannsaka ástæðurnar fyrir því að svo er komið sem hér kemur fram og hvað veldur því.
