Ráðstöfun á söluandvirði Landssíma Íslands hf.

Frú forseti. Mér finnst það merkilegt að jafnveigamikill þingmaður og hv. formaður fjárlaganefndar er skuli koma hingað og gagnrýna það frumvarp sem hæstv. heilbrigðisráðherra fyrir sitt leyti á þátt í að leggja hér fram.

Hv. formaður fjárlaganefndar gagnrýnir tvennt sem er megineinkenni á þeim hluta frumvarpsins sem lýtur að hæstv. heilbrigðisráðherra. Í fyrsta lagi lýsir hv. þingmaður því yfir að hann hafi efasemdir um að hæstv. heilbrigðisráðherra hafi tekið rétta ákvörðun um staðsetningu sjúkrahússins. Hvað veldur því?

Í öðru lagi gagnrýnir hv. formaður fjárlaganefndar þá ákvörðun hæstv. heilbrigðisráðherra að fara þessa leið við að búa til hið sameinaða hátæknisjúkrahús. Ég spyr hv. þingmann: Hefur hann viðrað þessa gagnrýni sína innan þingflokks Framsóknar og er það svo að þingflokkur Framsóknarflokksins sé þá klofinn um þessi tvö grundvallaratriði að því er varðar byggingu hátæknisjúkrahússins?