Lenging fæðingarorlofs.

Hæstv. forseti. Ég fagna innilega þeirri umræðu sem hv. þm. Katrín Júlíusdóttur kemur af stað hérna um fæðingarorlofið. Ég tel að þetta sé mjög mikilvægt mál sem hefur nú þegar og mun í framtíðinni hafa mikil áhrif á þjóðina alla. Þetta er eitt stærsta jafnréttismál seinni tíma þar sem réttur beggja foreldra til að vera með barninu er tryggður.

Lögin um fæðingarorlof hafa ekki síður haft mikil áhrif á atvinnulífið og tryggja betri nýtingu á mannauði okkar. Þar af leiðandi er nauðsynlegt að sveitarfélögin standi sig vel í að útvega daggæslu. Ég þekki þetta líka af mínum eigin raunum varðandi dagforeldra. Það er mjög mikilvægt að sveitarfélögin komi þarna sterkt inn til að tryggja þessa daggæslu.