Jafnréttisfræðsla fyrir ráðherra og stjórnendur opinberra stofnana.

Frú forseti. Það gleður mig að heyra að hæstv. ráðherra jafnréttismála hefur velt fyrir sér hvernig hann getur nálgast samráðherra sína með jafnréttismálin því tilefnin eru ærin. Ég vil minna á niðurstöðu sem kom úr fyrirspurn minni eða utandagskrárumræðu held ég nú að það hafi verið við hæstv. landbúnaðarráðherra á síðasta þingi en þar kom einmitt í ljós að hann stendur sig allra ráðherra verst varðandi jafnréttismál.

Það er líka öllum í fersku minni hvernig gengið var fram hjá hæfri konu við skipan í ráðherraembætti þegar síðasta ríkisstjórn var sett á fót.