Fjárlög 2006.
Virðulegur forseti. Ég hef gert ráð fyrir því varðandi sérkennsluna að hún væri inni í tillögum ráðherra. Það eru ekki neinar breytingartillögur um hana og ég hélt að hún væri inni í tillögum ráðherra.
Hvað varðar símenntunarstöðvarnar þá er, í texta um símenntun og fjarkennslu, gerð er tillaga um 100 millj. kr. til sérstaks átaks á næsta ári til að efla starfs- og endurmenntun ófaglærðra einstaklinga með litla menntun jafnframt því að bæta stöðu erlends vinnuafls í íslensku samfélagi. Þessi tillaga er gerð í samkomulagi við Alþýðusamband Íslands og Samtök atvinnulífsins. Miðað er við að menntamálaráðuneytið geri samning við Fræðslumiðstöð atvinnulífsins í þessi verkefni og að það verði að hluta til á vegum símenntunarmiðstöðvanna sem eiga náttúrlega að sinna þessu verkefni. Ég tel að það hljóti að rata í réttan farveg. Þetta er a.m.k. sá texti sem við leggjum áherslu á að fari í þann farveg. Þar með held ég að ég hafi svarað spurningunni.
En ég gerði ráð fyrir að sérkennslan væri í tillögum ráðherra, að hann hefði gert ráð fyrir þessu.