Grunnskólar.

Virðulegi forseti. Ég þakka hæstv. ráðherra fyrir ræðu hennar. Ég vildi spyrja út í 12. gr. frumvarpsins en þar er fjallað um stjórnun skóla. Í máli hæstv. ráðherra kom fram að m.a. væri um að ræða kröfu skólasamfélagsins. Ég hef reyndar á tilfinningunni að ítarlegar athugasemdir muni koma við þá breytingu. Löggjafinn hefur hingað til tryggt lágmarksstjórnun í grunnskólum landsins. Ég hef ákveðnar áhyggjur af stöðu mála verði þetta fellt út. Ég bið þess vegna hæstv. ráðherra um örlítið ítarlegri rökstuðning.