Vextir og verðtrygging.

Hæstv. forseti. Ég þakka hv. þm. Kristni H. Gunnarssyni fyrir framlag hans til umræðunnar. Ég er hjartanlega sammála því sem fram kom hjá honum. Auðvitað er það mikið áhyggjuefni fyrir Íslendinga að vaxtastig á lánum skuli vera þetta miklu hærra hér á landi en annars staðar. Það verður þess m.a. valdandi að fjárfestar flytja peninga sína inn í landið til ávöxtunar og hirða vaxtamuninn.

Við höfum tengt það stóriðjustefnunni að hluta til en áhættan sem lánveitandinn tekur, þ.e. hinn erlendi fjárfestir eða fjármagnseigandinn, er krónan. Ef hún fellur í verði rýrna þessir innfluttu peningar að sama skapi, meðan þeir eru til ávöxtunar í landinu. Yfirlýsingar stjórnvalda um áframhaldandi stóriðjuuppbyggingu þýða í reynd áframhaldandi ríkistryggða eftirspurn eftir gjaldmiðlinum, sem aftur þýðir hátt gengi sem þýðir aftur grænt ljós á meiri innflutning á fjármagni til landsins til að nýta sér vaxtamun í landinu.

En þetta er útúrdúr í mínu máli og kemur ekki við hugleiðingum hv. þm. Kristins H. Gunnarssonar, en þeim er ég hjartanlega sammála.