Boðun þingfundar.

Virðulegi forseti. Ég kveð mér hér hljóðs um störf þingsins til þess að halda því til haga og mótmæla því að hér sé settur nýr fundur klukkan sex síðdegis til að ræða það frumvarp sem hefur verið rætt og eru miklar deilur um, vatnalög. Ég vil segja, virðulegi forseti, máli mínu til stuðnings, að á fundi með forseta og þingflokksformönnum á mánudaginn þar sem rædd var vikuáætlun var gert ráð fyrir einum kvöldfundi, sem var í gær, og ekki talað um þennan fund nú.

Ég legg mikla áherslu á, virðulegi forseti, að bæði starfsáætlun og vikuáætlun sem settar eru fram séu haldnar og þingmenn geti treyst því sem þar er sett fram. Þingmenn hafa jú ýmsum öðrum skyldum að gegna og þurfa að ráðstafa sér til ýmissa annarra starfa, svo sem til funda í kjördæmum og annað slíkt. Þess vegna verða þingmenn að geta treyst á þau atriði.

Hér er hins vegar verið að setja nýjan fund á miðvikudegi klukkan sex að loknum þingflokksfundum til þess að ræða það frumvarp sem hér er sett á dagskrá, vatnalög. Ég vil, virðulegi forseti, að það komi fram að við í stjórnarandstöðunni mótmælum þessum fundi og því ráðslagi sem hér er og viljum þá um leið spyrja virðulegan forseta hvað það eigi þá að halda lengi áfram á þessu kvöldi með þetta mál. Það er nauðsynlegt að við vitum tímaáætlun og hvað á að halda lengi áfram.