Þýðingar kjarasamninga á erlend tungumál.

Virðulegi forseti. Ég vil þakka þær umræður sem hér hafa farið fram um þetta mikilvæga mál og þakka fyrirspyrjanda fyrir að hreyfa þessum málefnum innflytjenda. Þessi málaflokkur er mjög vaxandi í félagsmálaráðuneytinu. Ég tel mikilvægt að það sé hægt að sinna honum eins vel og föng eru á. Ég horfi vongóður til starfs innflytjendaráðs í því efni. Við þurfum að kortleggja hvar skórinn kreppir í þessum málum, hvers við eigum að vænta á næstunni. Þessi málaflokkur hefur, eins og ég segi, vaxið alveg gríðarlega og þetta er einn þátturinn.

Hins vegar vil ég undirstrika annan stóran þátt sem einnig hefur verið komið inn á hér í umræðunni en það er að sinna íslenskukennslu fyrir erlent fólk þannig að það geti komist í nánari tengsl við samfélagið með tungumálinu. Eigi að síður er þörf á að huga að þeim þætti sem hv. fyrirspyrjandi nefndi. Á þeim dögum sem ég hef verið í félagsmálaráðuneytinu hef ég orðið þess áskynja hvað innflytjendamálin eru gríðarlega stór og vaxandi þáttur og að þeim þarf að huga alveg sérstaklega.