Stofnun hlutafélags um Rafmagnsveitur ríkisins.

Hæstv. forseti. Hér er verið að greiða atkvæði um frumvarp til laga um stofnun hlutafélags um Rafmagnsveitur ríkisins. Hér er um eðlilega breytingu að ræða og mjög gott mál.

Hér er verið að gera rekstur Rariks sveigjanlegri með það að markmiði að bæta þjónustu við viðskiptavini Rariks hf. Jafnframt mun reksturinn í framtíðinni verða hagkvæmari sem mun að sjálfsögðu þá leiða til þess að raforkureikningar 49 þúsund notenda, viðskiptavina Rariks hf., munu lækka um alla framtíð.

Það er engin tilviljun, hæstv. forseti, að m.a. Hitaveita Suðurnesja skuli vera hlutafélag, Norðurorka skuli vera hlutafélag og Orkubú Vestfjarða. Það eru fleiri aðilar á þessum markaði sem einnig eru á þessu formi. Það er nefnilega samdóma álit stjórnenda þessara fyrirtækja að hlutafélagaformið sé best til þess fallið að reka fyrirtæki sem þessi í samkeppnisrekstri, með það að markmiði, eins og ég nefndi áðan, að veita viðskiptavinum sínum betri þjónustu og lægra raforkuverð til framtíðar litið.

Hæstv. forseti. Það er þjóðsaga sem Vinstri grænir hafa uppi í sölum Alþingis að hér sé verið að einkavæða Rarik hf. Kveðið er skýrt á um það í því frumvarpi sem hér um ræðir að öll hlutabréf í Rarik hf. skuli vera áfram í eigu ríkisins. Hér er því einungis um söguburð að ræða af hálfu þingmanna Vinstri grænna að verið sé að fara að selja þetta fyrirtæki úr almenningseigu. Það er ekki á stefnuskrá Framsóknarflokksins.