Miðstöð mæðraverndar.
Hæstv. forseti. Ég tel að sala Heilsuverndarstöðvarinnar hafi verið algert glapræði. Það er alveg sérstakt mál sem þarf að fara betur yfir. Enn alvarlegri er þó sú gjörð að ljóst er að salan var óundirbúin að öllu leyti, bæði hvað varðar nýtt húsnæði fyrir starfsemina, alla þá starfsemi sem var í húsinu og það sem verra var, það virðist ekki hafa verið hugað að því hvaða afleiðingar flutningurinn gæti haft fyrir þær konur sem taldar eru í áhættu á meðgöngu á höfuðborgarsvæðinu. Þær hafa flestar sótt þjónustu í Miðstöð mæðraverndar.
Þær skipulagsbreytingar sem nú eru að verða að veruleika leiða hugann að því hvert verið sé að stefna í mæðraeftirliti og eðlilegum fæðingum. Miðstöð mæðraverndar hefur sérhæft sig á sviði áhættumeðgöngu, hvort heldur hún hefur talist andleg, líkamleg eða félagsleg. Þessi þjónusta hefur styrkt Miðstöð mæðraverndar sem miðstöð á sviði sérfræði- og stoðþjónustu mæðraverndar fyrir allt landið. Það er æskileg þróun að efla mæðravernd á öllum heilsugæslustöðvum og því er mikilvægt að sérfræðiþekking ljósmæðra og lækna sé til staðar.
Á höfuðborgarsvæðinu eru deildar meiningar um það hvar eftirlit eigi að fara fram með þeim konum sem taldar eru í áhættumeðgöngu. Mannekla og skortur á sérfræðingum á þessu sviði hefur að einhverju leyti ráðið för. Það er þó ljóst að það er verið að spítalavæða það mæðraeftirlit sem mikil ánægja hefur verið með hjá þeim konum sem vísað hefur verið til Miðstöðvar mæðraverndar.
Að kippa þessari mikilvægu starfsemi burt setur um leið starfsemi Miðstöðvarinnar í uppnám. Fæðingarheimili Reykjavíkur starfaði hér um árabil og var rekstur og stefna þess til fyrirmyndar. Ef konur mættu ráða fæddu þær flestar í því andrúmslofti og þjónustu sem var á fæðingardeildinni, þ.e. ef þær þurfa og óska eftir því að fæða á stofnunum. Þá höfðu þær val. Í dag fæða þær allar á hátæknisjúkrahúsi.
Ég vil leyfa mér að spyrja hæstv. ráðherra. Verður MFS — meðganga, fæðing, sængurlega — aftur komið á hjá þeim konum sem sækja mæðraverndina vegna áhættumeðgöngu á LSH?