svör við fyrirspurnum, þingstörfin fram undan o.fl.

Herra forseti. Ég kveð mér hljóðs til að ræða um störf þingsins og tek heils hugar undir með fulltrúum stjórnarandstöðunnar sem hér hafa staðið upp í dag. Það er mjög alvarlegt mál þegar stjórn þingsins, herra forseti, virðist vera í höndum eins stjórnmálaflokks á þinginu. Störf þingsins eru í herkví Sjálfstæðisflokksins. Það er Sjálfstæðisflokkurinn sem stjórnar þinghaldi hér og getur ráðskast með það hvenær fyrirspurnir eru, hvenær mál eru tekin á dagskrá. Það er grafalvarlegt mál.

Hér eru haldnir kvöldfundir, kvöldfundir sem ná til miðnættis kvöld eftir kvöld. Það er byrjað óvenjusnemma og við vitum ekkert hvernig á að halda þinghaldi áfram. Nefndarfundir eru líka í upplausn, þeir eru í skötulíki. Menn mæta á nefndarfundi snemma á morgnana og síðan eru boðaðir nefndarfundir jafnvel í hádeginu, hálftímanefndarfundur í félagsmálanefnd o.s.frv. Það liggja mörg brýn mál fyrir þessu þingi. Hv. þm. Ögmundur Jónasson kom einmitt inn á eitt áðan, spilafíkn. Ég bendi enn fremur á mál eins og Vatnajökulsþjóðgarð. Það er mál sem ég mundi frekar vilja leiða til lykta í þinginu og ég hélt að um það mál ætti að geta náðst þokkalegt samkomulag. Þess í stað fær Sjálfstæðisflokkurinn að vaða hérna uppi í einkavæðingarkrossferð sinni sem að þessu sinni bitnar á Ríkisútvarpinu okkar og það er grafalvarlegt mál, herra forseti.