samgönguáætlun fyrir árin 2007--2018.

Hæstv. forseti. Það er gefið mál, hv. þm. Halldór Blöndal, að það verður að takmarka styrkinn og gefa upp einhverjar tölur miðað við ákveðna siglingaleið og svo ræðst það hverjir treysta sér til að reka útgerð skipa miðað við þær forsendur sem gefnar eru. Væntanlega þarf þetta reikningsdæmi að vera þannig að það sé líklegt að menn vilji sækja í þetta alveg eins og menn leita eftir samningum um flugleiðir þar sem flugsamgöngum þarf að halda við.

Varðandi það sem hv. þingmaður talaði um jarðgöng er það rétt, við í Frjálslynda flokknum höfum flutt tillögu til þingsályktunar um jarðgöng. Í greinargerð með tillögu okkar sem er á þskj. 15 er fyrirspurn hv. þingmanns svarað, með leyfi forseta.

„Öllum er ljóst eftir reynsluna af Vestfjarða- og Hvalfjarðargöngum hvaða hag menn hafa af svo öruggum þjóðvegum, styttri leiðum milli staða og landsvæða, sem og tíma- og eldsneytissparnaði sem fylgir varanlegum samgöngubótum sem endast í áratugi og aldir. Gefin var út áætlun um jarðgöng í janúar árið 2000 og lagt til að hún yrði endurskoðuð á fjögurra ára fresti. Þar eru talin upp 24 jarðgangaverkefni. Þegar hefur verið unnið að gerð nýrra, góðra fjallvega um Klettsháls, Bröttubrekku og Vatnaleið (í stað leiðarinnar Staðarsveit – Kolgrafarfjörður) og lokið er gerð jarðganga undir Almannaskarð og milli Reyðarfjarðar og Fáskrúðsfjarðar. Svokölluð Héðinsfjarðargöng eru nú komin á framkvæmdastig og láglendisvegur verður lagður yfir Mjóafjörð í Djúpi um Reykjanes. Göng undir Eyrarfjall í Djúpi verða þar af leiðandi ekki á dagskrá.“

Þetta svarar væntanlega fyrirspurn hv. þingmanns. Auðvitað erum við ekki að biðja um göng þar sem nýbúið er að leggja vegi.