þátttaka Lýðveldisins Búlgaríu og Rúmeníu á Evrópska efnahagssvæðinu.

Virðulegi forseti. Hv. síðasti ræðumaður spyr hvernig Ísland ætli að nýta sér þennan aðlögunarfrest og því er til að svara að við höfum samþykkt ákveðna stefnumótun í málefnum innflytjenda. Við samþykktum árið 2007 löggjöf sem átti að búa okkur betur undir að taka á móti fólki sem vill setjast hér að eða vinna hér á landi og það var mjög framsækin og góð löggjöf. Hún fjallaði um réttindi og skyldur erlendra fyrirtækja sem senda starfsmenn tímabundið til Íslands og starfskjör starfsmanna þeirra.

Það þarf að vinna þá löggjöf áfram í stjórnsýslunni. Við erum að undirbúa stjórnsýsluna undir framkvæmd á ýmsum þeim atriðum sem fram koma í henni og við munum auðvitað nýta tímann til að hrinda löggjöfinni í framkvæmd. Það liggur fyrir nýleg skýrsla um ýmis framkvæmdaatriði sem við þurfum að fara í og að því verður að sjálfsögðu unnið.

Síðan er það stefnumótun í málefnum innflytjenda að það er verið að undirbúa framkvæmdaáætlun til þess að tryggja framkvæmd þeirrar stefnumótunar og það er auðvitað eitt af þeim atriðum sem við þurfum að nýta okkur á þessum aðlögunartíma.

Varðandi það hvaða lönd hafa nýtt sér þennan aðlögunarfrest þá eru þau fjölmörg sem munu nýta hann. Það eru Portúgal, Írland, Spánn, Frakkland, Danmörk, Belgía, Lúxemborg, Grikkland, Ítalía, Holland, Malta og Ungverjaland svo dæmi séu tekin og það er athyglisvert að Írar og Bretar sem voru mjög opnir við stækkunina nýttu sér ekki aðlögunina frá 2004 en þeir hafa nú ákveðið að nýta sér þessa frestun gagnvart Búlgaríu og Rúmeníu.