stjórnarskipunarlög.
Virðulegi forseti. Ég tók eftir því að hv. þingmaður hefur lagt fram frumvarp um breytingar á stjórnarskránni og útskýrði það í fréttaviðtali að hann ætti ekki von á að það næði fram að ganga heldur væri það innlegg af hans hálfu til að kalla fram umræður um þetta tiltekna atriði. Hann hefur fullan skilning á því að það er kannski ekki alveg raunhæft að hver og einn þingmaður sem leggur fram frumvarp til laga um breytingar á stjórnarskránni geti vænst þess að slík frumvörp fái afgreiðslu og samþykki og þar með verði þing rofið og boðað til þingkosninga þótt vissulega sé það ferillinn sem ráðgerður er í stjórnarskránni eins og hv. þingmaður ýjaði að. Auðvitað segir þar ekkert um hlutverk formanna flokkanna eða yfirleitt annarra en þingmanna í því efni.
Í reynd hefur þetta verið þannig að það hafa verið formenn flokkanna eða einhverjir á þeirra vegum sem hafa komið sér saman um breytingar í þessum efnum og síðan flutt hér frumvörp sem Alþingi hefur þá stutt. Það hefur byggst á vinnu meðal þingflokkanna og meðal þingmanna þannig að um það hefur skapast bærileg sátt þó að hún hafi ekki alltaf verið hundrað prósent. Þannig var þetta 1983, 1991, 1995 og 1999 svo að ég taki bara nokkrar breytingar sem ég man sjálfur vel eftir og tók að hluta til þátt í. Það er því ekki raunhæft að reikna með því að einstakar tillögur hljóti samþykki og efnt verði til þingkosninga af því tilefni. Það er raunhæft að reikna með að tillögur geti náð fram að ganga næst þegar tekst að efna í einhvers konar samkomulag um breytingar og ég tel ekki að það sé raunhæft fyrr en á þingvetrinum 2010–2011 úr því sem komið er. Þar eru hugmyndir eins og hv. þingmaður gat um velkomnar og eiga þar svo sannarlega heima.
