yfirtaka ríkisins á Speli ehf. og niðurfelling veggjalds um Hvalfjarðargöng.

Herra forseti. Mér finnst þetta vera alveg hárrétt ábending hjá hv. þm. Guðna Ágústssyni. Það er raunverulega verið að skattleggja vegfarendur þessara ganga umfram aðra vegfarendur á þjóðvegakerfi landsins. Fyrir þá sem eru háðir því atvinnu sinnar vegna og búsetu að fara kannski tvisvar um göngin á dag er þetta umtalsverður skattur. Auk þess leggst þetta líka á flutningskostnað vara til og frá höfuðborgarsvæðinu og kemur þannig líka sem skattur. Það er sama hvernig á málið er litið, það er mikið sanngirnis- og réttlætismál að sértæk skattlagning af þessu tagi eins og á við um Hvalfjarðargöngin verði felld niður. Mér finnst það vera hárrétt og góð ábending hjá hv. þingmanni, hversu mikið sanngirnis- og réttlætismál þetta er og krafan um jafnræði einmitt hvað skattlagningu varðar.