framkvæmdaáætlun í barnaverndarmálum til 2010.
Herra forseti. Það er margt og merkilegt sem hv. þm. Grétar Mar Jónsson hefur til málanna að leggja þegar við ræðum um barnaverndarmál. Ég heyrði ekki eitt einasta orð í hans ræðu sem sneri að tillögunni sem liggur fyrir en hins vegar getur hann talað lengi um Sjálfstæðisflokkinn. Mér finnst í sjálfu sér ágætt að hann skuli hafa svona mikinn áhuga á honum. Það sýnir náttúrlega þá virðingu sem Sjálfstæðisflokkurinn hefur í þessu landi.
En það væri áhugavert ef Frjálslyndi flokkurinn, með Grétar Mar Jónsson í broddi fylkingar, hefði eitthvað raunverulegt til málanna að leggja, eitthvað annað en píp um hverjir séu hér, hverjir sitji og hlusti á skrifstofum sínum og hverjir séu í salnum. Ég held satt að segja að það væri skemmtilegra að eiga orðastað við mann sem hefði eitthvað raunverulegt til málanna að leggja.
Það væri gaman að spyrja hann út í nokkur atriði því ég er viss um að hv. þm. Grétar Mar Jónsson, frá Sandgerði, hefur lesið þessa tillögu afskaplega vel. Mig langar t.d. að vita hvaða skoðanir hann hefur á þeim rannsóknarverkefnum sem fjallað er um í þessari tillögu og hvort hann telji ekki til verulegra bóta að auka rannsóknir á umhverfi barna. Eða hvað finnst honum um að sérstök áhersla sé lögð á að veita athygli ungum börnum, eins og menn hafa rætt í dag, og þeim hættum sem að þeim steðja?
Heldur hv. þm. Grétar Mar Jónsson að Sjálfstæðisflokkurinn, sem ég veit ekki betur en sé í ríkisstjórn, styðji ekki mál hæstv. félagsmálaráðherra? Ekki fylgist hann vel með ef það er raunin.