skuld ríkisins við verktakafyrirtækið Impregilo.
Frú forseti. Þetta mál á sér nokkra forsögu í þinginu. Ég hef spurst fyrir um það nokkrum sinnum áður, fyrst strax á árinu 2003 þar sem ég þóttist sjá að nokkur vandamál gætu komið upp hvað varðaði skattalega meðferð mála við stórframkvæmdirnar á Kárahnjúkum og einkum hvað varðaði þá skatttekjur af erlendum starfsmönnum, starfsmannaleigna og undirverktaka sem ynnu fyrir aðalverktakana á svæðinu. Svar fjármálaráðherra þá var á þá leið að ekki væri ástæða til að ætla að nein sérstök vandamál yrðu við skattalega meðferð þessara mála umfram það sem vænta mátti við stór verk af þessu tagi.
Þetta vakti nokkra undrun mína þannig að ég endurtók fyrirspurn mína strax ef ég man rétt og í a.m.k. þrjú fyrstu skiptin svöruðu fjármálaráðherrar alltaf á sama veg, að þetta væri allt í góðum farvegi. Annað hefur nú komið á daginn og ríkið tapaði í rétti máli þar sem Impregilo fékk það staðfest að það skyldi ekki teljast launagreiðandi við þessar aðstæður heldur væru það starfsmannaleigurnar eða undirverktakar. Því hefði ekki verið heimilt að láta fyrirtækið borga skatta þessara starfsmanna og ríkið hlyti því að þurfa að endurgreiða fyrirtækinu. Í framhaldi af því að ekkert gerðist í uppgjörsmálum höfðaði síðan fyrirtækið mál sem það vann í héraði um að ríkinu bæri að endurgreiða upphæðina. Skuldin mun vera, eða var samkvæmt fjölmiðlafréttum um mitt sumar, um 1,5 milljarðar kr. eða ríflega það og dráttarvaxtagreiðslur yfir 1 millj. kr. á dag.
Í ágúst kom það í fréttum að fjármálaráðuneytið hefði tekið meðferð málsins úr höndum ríkisskattstjóra sem hafði þá hafið undirbúning að uppgjöri skuldarinnar. Nú leikur mér hugur á að vita hvernig þetta mál stendur og ekki er hægt að segja að útkoman úr því fyrir ríkissjóð eða fjármálaráðherra sé sérlega glæsileg. Ekki einungis virðist allt stefna í að þessar skatttekjur tapist ríkinu, heldur falli stórkostlegar drattarvaxtagreiðslur á það þar til viðbótar. Því spyr ég:
1. Hver er heildarupphæð skuldar ríkisins við verktakafyrirtækið Impregilo orðin í dag að meðtöldum dráttarvöxtum, samanber dóm Hæstaréttar 20. september 2007 og það sem síðar hefur gerst?
2. Hverju sætir að skuldin hefur ekki verið gerð upp eða a.m.k. borgað inn á hana til að draga úr kostnaði vegna dráttarvaxta?
3. Hverjar voru ástæður þess að fjármálaráðuneytið tók uppgjör málsins úr höndum ríkisskattstjóra?