eftirlaun forseta Íslands, ráðherra, alþingismanna og hæstaréttardómara.

Virðulegi forseti. Ég tel rétt að leiðrétta hv. þingmann sem fór rangt með það sem ég hafði sagt. Ég hélt því ekki fram að verið væri að færa þingmenn í A-deildina heldur að að færa réttindi þeirra til samræmis við það sem væri í A-deildinni, á því er auðvitað munur.

Mig langar að rifja hér upp það sem fram hefur komið, að samkvæmt upplýsingum á heimasíðu Lífeyrissjóðs starfsmanna ríkisins kemur fram að þeir sem eru í A-deild njóta þeirra réttinda að þeir geta tekið út lífeyri sinn samhliða starfi og réttur til lífeyris er ekki bundinn við starfslok. Þeir geta haldið áfram í starfi sínu þegar þeir hafa náð þeim aldri að þeir geta tekið út lífeyri og eiga rétt á því.

Fram kom í máli hæstv. fjármálaráðherra að hann taldi að — áður en ég kem að því minni ég á að hv. þingmaður sagði í viðtali í Morgunblaðinu 22. júní 2006 að afnema ætti eftirlaunalögin og, með leyfi forseta:

„… láta þessa starfsmenn hins opinbera ganga inn í þá sjóði sem fyrir eru, sem væri þá væntanlega A-deild LSR. [...] Um þessa starfsmenn eiga að gilda sömu reglur og um aðra en ég kem ekki auga á nein rök sem mæla með öðru.“

Ég spyr hv. þingmann: Er hann sammála því að verði eftirlaunaréttindi alþingismanna færð til samræmis við það sem gildir í A-deild LSR að það gildi þá að öllu leyti? Ég spyr hann jafnframt að því hvort það sé rétt hjá hæstv. fjármálaráðherra að þeir sem fá lífeyri úr A-deild LSR búi við skerðingu á þeim lífeyrisréttindum hafi þeir aðrar tekjur.