aðgerðir til að auka hlut kvenna í sveitarstjórnum.
Virðulegi forseti. Ég þakka hv. þm. Þórunni Sveinbjarnardóttur fyrir að taka undir þau meginviðhorf sem ég setti hér fram varðandi kvennabaráttuna. Ég sé ekki að við séum neitt á öndverðum meiði hvað varðar þetta mál að öðru leyti en því að hv. þm. Þórunn Sveinbjarnardóttir heldur fram að viðhorfsbreytingin gangi mjög hægt. Hún fór 5.000 ár aftur í söguna. Það skal tekið fram að af þeim 5.000 árum sem hv. þm. Þórunn Sveinbjarnardóttir vísaði til var þróunin í algjörri kyrrstöðu í 4.900 ár. Það er ekkert lengra síðan, fyrir rúmum 100 árum varð einhver þróun í þessu, og þróun í átt til jafnstöðu karla og kvenna er ekki nema í kringum 30 ára gömul.
Hvenær komu fyrstu lögin um jafnstöðu karla og kvenna? Ég man eftir því þegar um þau var rætt, sá merki alþingismaður og ráðherra dr. Gunnar Thoroddsen barðist hatramlega fyrir því að sett yrðu lög um jafnstöðu karla og kvenna. Á þeim tíma sem hann kom fram með þær hugmyndir, fyrir um 30 árum, mættu þær töluverðri andstöðu, ekki bara í einum stjórnmálaflokki heldur fleirum. Slík lög mundu hvergi mæta andstöðu í dag, heldur mundu þau teljast sjálfsagður hlutur. Við skulum bara athuga að það er ekki lengri tími en þetta síðan hlutirnir fóru á töluverða ferð.
Í þessari tillögu til þingsályktunar sem hér fylgir, í greinargerðinni, kemur einmitt fram hver hlutur kvenna var t.d. 1950 og hver hann var árið 2006. Við sjáum að það er stöðug stígandi í þessu sem betur fer, hlutur kvenna eykst stöðugt.