umræða um dagskrármál.

Hæstv. forseti. Fyrir hádegishlé fór fram umræða um það hvort forseti Alþingis mundi reyna að leita leiða til að greiða fyrir þingstörfum og leita samkomulags um hvernig við mundum haga dagskránni í dag. Við sjálfstæðismenn höfum komið með tillögur um að 9. mál á dagskrá yrði rætt, heimild til samninga um álver í Helguvík. Okkur finnst mikilvægara að ræða það á þessari stundu frekar en að stjórnarskipunarlögin verði tekin á dagskrá, sem er 5. mál á dagskrá. Skemmst er frá því að segja að á fundi okkar formanna þingflokka núna í hádeginu var því hafnað að málið um Helguvík yrði tekið á dagskrá. Reyndar var því borið við að ekki væri komið nefndarálit í málinu frá hv. þingmönnum Vinstri grænna og var þá boðið upp á að 6. málið, sem er um vaxtabætur, yrði rætt en tekið skal fram, hæstv. forseti, að því var jafnframt hafnað. En ég vil spyrja hæstv. forseta sem er núna á forsetastóli hvort hann muni íhuga að breyta röð á dagskrá.