stefna VG í efnahagsmálum -- orð þingmanns um framlög til stjórnmálaflokka.

Hæstv. forseti. Ég leyfi mér að bregðast við vegna alveg ótrúlegrar umræðu af hálfu þingmanna Vinstri grænna og Samfylkingarinnar. Hv. þm. Jón Bjarnason fullyrðir það eins og hann sé að tala í alvöru að Sjálfstæðisflokkurinn hafi staðið að hruninu. Þvílík ummæli og fullyrðingar eru náttúrlega ekki samboðnar þingmanni á Alþingi Íslendinga.

Í aðdraganda kosninganna 2007 var staða okkar Íslendinga talin öfundsverð í öllu tilliti. Að loknum kosningum 2007 slógust Samfylkingin og Vinstri grænir um að fá að fara í stjórn með Sjálfstæðisflokknum, það liggur fyrir. Hæstv. núverandi fjármálaráðherra var stórmóðgaður vegna þess að hann missti af strætisvagninum í hendurnar á Samfylkingunni sem fór í samstarf með Sjálfstæðisflokknum.

Síðan þekkjum við hvað hefur gerst. Að halda því fram að hið alþjóðlega bankahrun og sú staða sem í kjölfarið varð sé einum stjórnmálaflokki að kenna er ótrúlegur málflutningur, hann er ekki samboðinn ágætum hv. þingmönnum á Alþingi Íslendinga. (Gripið fram í.) Stóryrði af hálfu þessara ágætu þingmanna eru svipuð og Jón sterki í Skugga-Sveini viðhafði: „Sáuð þið hvernig ég tók hann?“ Og síðan ekki söguna meir. Verkin birtast ekki og það stefnir allt í voða hjá okkur. Við þekkjum hvernig staðan í gengismálunum er, við sjáum hvað ríkisstjórnin ætlar að gera. Hún ætlar fyrst og fremst að auka útgjöld ríkisins. Hún sér eingöngu leið til uppbyggingar í atvinnulífinu með því að auka útgjöld, (Forseti hringir.) bæta við ríkisstarfsmönnum og lækka laun (Forseti hringir.) opinberra starfsmanna. Það er mjög athyglisvert útspil.