stjórn fiskveiða.

Virðulegi forseti. Hér er komið að því að greiða atkvæði um efnisatriði þess frumvarps sem við höfum verið að ræða mestan hluta dagsins. Sannarlega er það þannig að ýmislegt í þessu frumvarpi er til bóta sem má svo sem lýsa stuðningi við en annað er lakara. Það sem er verst í þessum efnum er það að hinn svokallaði strandveiðihluti frumvarpsins er algjörlega vanbúinn eins og hefur glögglega komið fram í þessum umræðum.

Þær breytingartillögur sem meiri hluti nefndarinnar leggur til eru lítils háttar viðleitni í rétta átt en nægja engan veginn til þess að gera þetta mál þannig úr garði að hægt sé að styðja það. Þetta eru í sjálfu sér jákvæðar breytingartillögur eins langt og þær ná og út af fyrir sig hægt að fagna því en hins vegar er það þannig að málið er í fullkominni óvissu, það er óljóst og það mun ekki ná þeim markmiðum sem að er stefnt, hvorki með nýliðun eða sem stuðningur við byggðirnar, þvert á móti, og þess vegna mun það koma fram í afstöðu okkar sjálfstæðismanna í þessari atkvæðagreiðslu.