kjararáð o.fl.

Frú forseti. Ég þakka hæstv. ráðherra svörin. Hins vegar fannst mér þau ekki nægilega skýr að því leyti að hæstv. ráðherra sagði að ráðuneytum yrði væntanlega fækkað um tvö á kjörtímabilinu og það eru næstum fjögur ár eftir af þessu kjörtímabili. Í ljósi þess tók það ríkisstjórnina ekki nema einungis nokkrar vikur að setja á fót, sem verður gert í haust, sérstakt viðskipta- og efnahagsráðuneyti sem á að samþætta ýmsa þætti innan viðskiptaráðuneytisins, forsætisráðuneytisins og fjármálaráðuneytisins. Mjög flókin framkvæmd, trúlega miklu flóknari framkvæmd en til að mynda gera eitt atvinnuvegaráðuneyti eða að sameina dómsmálaráðuneyti og samgönguráðuneyti.

Ég spyr: Hvar er viljinn til þess að sameina þessi ráðuneyti og ráðast í einhverjar raunverulegar hagræðingaraðgerðir? Miðað við þann tíma sem það tók hæstv. ríkisstjórn að búa til nýtt efnahags- og viðskiptaráðuneyti ætti það einungis að vera nokkurra vikna verk að sameina þessi ráðuneyti og ná þar af leiðandi tugmilljóna króna sparnaði í rekstri hins opinbera og veitir svo sannarlega ekki af því.

Ég inni hæstv. ráðherra aftur eftir því hvar viljinn sé til að spara á þessum sviðum. Er það virkilega svo að stólarnir eru mikilvægari fyrir Vinstri hreyfinguna – grænt framboð og Samfylkinguna en það að spara í ríkisrekstri? Ég er alveg sannfærður um það, þ.e. ef viljinn er fyrir hendi, að það er hægur vandi að sameina þessi ráðuneyti og við þurfum ekki hátt í fjögur ár til þess. Ég óska eftir einhverjum tímasetningum á því frá hæstv. ráðherra. Svo væri fróðlegt að heyra hæstv. ráðherra tjá sig um hugmyndir hv. þm. Valgerðar Bjarnadóttur um að hafa ráðuneytin bara sjö.