Lánasjóður íslenskra námsmanna.

Virðulegur forseti. Hv. þingmaður spurði hvort nefndin hefði fjallað um reglur um lánshæfismat með fulltrúum stjórnar lánasjóðsins. Við gerðum það og ræddum þetta líka okkar á milli. Það er einmitt þess vegna sem við setjum þennan kafla í nefndarálitið, við leggjum áherslu á það að þegar nýjar reglur verða settar verði skilyrðið ekki svo þröngt að breytingarnar á lögunum hafi ekkert að segja, þannig að við erum einmitt að leggja áherslu á það í þessu nefndaráliti.

Varðandi framfærslugrunninn er alveg ljóst að í núverandi ramma er ekki möguleiki til þess að hækka hann en mér finnst mikilvægt að við leitum leiða til þess að hækka framfærslugrunninn í áföngum og geri ráð fyrir því að um það verði rætt.