álit Seðlabankans um Icesave o.fl.

Virðulegi forseti. Mig langar að koma hér upp vegna ummæla formanns utanríkismálanefndar sem höfð hafa verið eftir honum úr þessum ræðustól vegna málefna Seðlabankans og þess álits sem hann hefur á lögfræðingum bankans og raunverulega beinist gagnrýnin helst að yfirlögfræðingi bankans. Hann lét hafa eftir sér eftirfarandi sem er á mbl.is í dag, með leyfi forseta:

„Er þetta ekki bara fólk sem er enn þá í vinnu hjá gamla seðlabankastjóranum?“

Hvernig getur hv. þingmaður rætt málin með þessum hætti? Gerir hann sér ekki grein fyrir hvaða ábyrgðarstöðu hann gegnir fyrir Alþingi?

Í leiðinni langar mig til að spyrja hann hvort hann telji að skipun Svavars Gestssonar sem formanns samninganefndar í Icesave-deilunni hafi byggst á faglegu mati á hæfileikum hans til þeirra hluta eða pólitík og mig langar til að hv. þingmaður beri þessi mál örlítið saman.